శ్రీ మహాలక్ష్మీ సుప్రభాతమ్

॥శ్రీమహాలక్ష్మీసుప్రభాతమ్॥

శ్రీలక్ష్మి శ్రీమహాలక్ష్మి క్షీరసాగరకన్యకే ఉత్తిష్ఠ హరిసమ్ప్రీతే భక్తానాం భాగ్యదాయిని । ఉత్తిష్ఠోత్తిష్ఠ శ్రీలక్ష్మి విష్ణువక్షస్థలాలయే ఉత్తిష్ఠ కరుణాపూర్ణే లోకానాం శుభదాయిని ॥ ౧॥

శ్రీపద్మమధ్యవసితే వరపద్మనేత్రే శ్రీపద్మహస్తచిరపూజితపద్మపాదే । శ్రీపద్మజాతజనని శుభపద్మవక్త్రే శ్రీలక్ష్మి భక్తవరదే తవ సుప్రభాతమ్ ॥ ౨॥

జామ్బూనదాభసమకాన్తివిరాజమానే తేజోస్వరూపిణి సువర్ణవిభూషితాఙ్గి । సౌవర్ణవస్త్రపరివేష్టితదివ్యదేహే శ్రీలక్ష్మి భక్తవరదే తవ సుప్రభాతమ్ ॥ ౩॥

సర్వార్థసిద్ధిదే విష్ణుమనోఽనుకూలే సమ్ప్రార్థితాఖిలజనావనదివ్యశీలే । దారిద్ర్యదుఃఖభయనాశిని భక్తపాలే శ్రీలక్ష్మి భక్తవరదే తవ సుప్రభాతమ్ ॥ ౪॥

చన్ద్రానుజే కమలకోమలగర్భజాతే చన్ద్రార్కవహ్నినయనే శుభచన్ద్రవక్త్రే । హే చన్ద్రికాసమసుశీతలమన్దహాసే శ్రీలక్ష్మి భక్తవరదే తవ సుప్రభాతమ్ ॥ ౫॥

శ్రీఆదిలక్ష్మి సకలేప్సితదానదక్షే శ్రీభాగ్యలక్ష్మి శరణాగత దీనపక్షే । ఐశ్వర్యలక్ష్మి చరణార్చితభక్తరక్షిన్ శ్రీలక్ష్మి భక్తవరదే తవ సుప్రభాతమ్ ॥ ౬॥

శ్రీధైర్యలక్ష్మి నిజభక్తహృదన్తరస్థే సన్తానలక్ష్మి నిజభక్తకులప్రవృద్ధే । శ్రీజ్ఞానలక్ష్మి సకలాగమజ్ఞానదాత్రి శ్రీలక్ష్మి భక్తవరదే తవ సుప్రభాతమ్ ॥ ౭॥

సౌభాగ్యదాత్రి శరణం గజలక్ష్మి పాహి దారిద్ర్యధ్వంసిని నమో వరలక్ష్మి పాహి । సత్సౌఖ్యదాయిని నమో ధనలక్ష్మి పాహి శ్రీలక్ష్మి భక్తవరదే తవ సుప్రభాతమ్ ॥ ౮॥

శ్రీరాజ్యలక్ష్మి నృపవేశ్మగతే సుహాసిన్ శ్రీయోగలక్ష్మి మునిమానసపద్మవాసిన్ । శ్రీధాన్యలక్ష్మి సకలావనిక్షేమదాత్రి శ్రీలక్ష్మి భక్తవరదే తవ సుప్రభాతమ్ ॥ ౯॥

శ్రీపార్వతీ త్వమసి శ్రీకరి శైవశైలే క్షీరోదధేస్త్వమసి పావని సిన్ధుకన్యా । స్వర్గస్థలే త్వమసి కోమలే స్వర్గలక్ష్మీ శ్రీలక్ష్మి భక్తవరదే తవ సుప్రభాతమ్ ॥ ౧౦॥

గఙ్గా త్వమేవ జననీ తులసీ త్వమేవ కృష్ణప్రియా త్వమసి భాణ్డిరదివ్యక్షేత్రే । రాజగృహే త్వమసి సున్దరి రాజ్యలక్ష్మీ శ్రీలక్ష్మి భక్తవరదే తవ సుప్రభాతమ్ ॥ ౧౧॥

పద్మావతీ త్వమసి పద్మవనే వరేణ్యే శ్రీసున్దరీ త్వమసి శ్రీశతశృఙ్గక్షేత్రే । త్వం భూతలేఽసి శుభదాయిని మర్త్యలక్ష్మీ శ్రీలక్ష్మి భక్తవరదే తవ సుప్రభాతమ్ ॥ ౧౨॥

చన్ద్రా త్వమేవ వరచన్దనకాననేషు దేవి కదమ్బవిపినేఽసి కదమ్బమాలా । త్వం దేవి కున్దవనవాసిని కున్దదన్తీ శ్రీలక్ష్మి భక్తవరదే తవ సుప్రభాతమ్ ॥ ౧౩॥

శ్రీవిష్ణుపత్ని వరదాయిని సిద్ధలక్ష్మి సన్మార్గదర్శిని శుభఙ్కరి మోక్షలక్ష్మి । శ్రీదేవదేవి కరుణాగుణసారమూర్తే శ్రీలక్ష్మి భక్తవరదే తవ సుప్రభాతమ్ ॥ ౧౪॥

అష్టోత్తరార్చనప్రియే సకలేష్టదాత్రి హే విశ్వధాత్రి సురసేవితపాదపద్మే । సఙ్కష్టనాశిని సుఖఙ్కరి సుప్రసన్నే శ్రీలక్ష్మి భక్తవరదే తవ సుప్రభాతమ్ ॥ ౧౫॥

ఆద్యన్తరహితే వరవర్ణిని సర్వసేవ్యే సూక్ష్మాతిసూక్ష్మతరరూపిణి స్థూలరూపే । సౌన్దర్యలక్ష్మి మధుసూదనమోహనాఙ్గి శ్రీలక్ష్మి భక్తవరదే తవ సుప్రభాతమ్ ॥ ౧౬॥

సౌఖ్యప్రదే ప్రణతమానసశోకహన్త్రి అమ్బే ప్రసీద కరుణాసుధయాఽఽర్ద్రదృష్ట్యా । సౌవర్ణహారమణినూపురశోభితాఙ్గి శ్రీలక్ష్మి భక్తవరదే తవ సుప్రభాతమ్ ॥ ౧౭॥

నిత్యం పఠామి జనని తవ నామ స్తోత్రం నిత్యం కరోమి తవ నామజపం విశుద్ధే । నిత్యం శృణోమి భజనం తవ లోకమాతః శ్రీలక్ష్మి భక్తవరదే తవ సుప్రభాతమ్ ॥ ౧౮॥

మాతా త్వమేవ జననీ జనకస్త్వమేవ దేవి త్వమేవ మమ భాగ్యనిధిస్త్వమేవ । సద్భాగ్యదాయిని త్వమేవ శుభప్రదాత్రీ శ్రీలక్ష్మి భక్తవరదే తవ సుప్రభాతమ్ ॥ ౧౯॥

వైకుణ్ఠధామనిలయే కలికల్మషఘ్నే నాకాధినాథవినుతే అభయప్రదాత్రి । సద్భక్తరక్షణపరే హరిచిత్తవాసిన్ శ్రీలక్ష్మి భక్తవరదే తవ సుప్రభాతమ్ ॥ ౨౦॥

నిర్వ్యాజపూర్ణకరుణారససుప్రవాహే రాకేన్దుబిమ్బవదనే త్రిదశాభివన్ద్యే । ఆబ్రహ్మకీటపరిపోషిణి దానహస్తే శ్రీలక్ష్మి భక్తవరదే తవ సుప్రభాతమ్ ॥ ౨౧॥

లక్ష్మీతి పద్మనిలయేతి దయాపరేతి భాగ్యప్రదేతి శరణాగతవత్సలేతి । ధ్యాయామి దేవి పరిపాలయ మాం ప్రసన్నే శ్రీలక్ష్మి భక్తవరదే తవ సుప్రభాతమ్ ॥ ౨౨॥

శ్రీపద్మనేత్రరమణీవరే నీరజాక్షి శ్రీపద్మనాభదయితే సురసేవ్యమానే । శ్రీపద్మయుగ్మధృతనీరజహస్తయుగ్మే శ్రీలక్ష్మి భక్తవరదే తవ సుప్రభాతమ్ ॥ ౨౩॥

ఇత్థం త్వదీయకరుణాత్కృతసుప్రభాతం యే మానవాః ప్రతిదినం ప్రపఠన్తి భక్త్యా । తేషాం ప్రసన్నహృదయే కురు మఙ్గలాని శ్రీలక్ష్మి భక్తవరదే తవ సుప్రభాతమ్ ॥ ౨౪॥

జలధీశసుతే జలజాక్షవృతే జలజోద్భవసన్నుతే దివ్యమతే । జలజాన్తరనిత్యనివాసరతే శరణం శరణం వరలక్ష్మి నమః ॥ ౨౫॥

ప్రణతాఖిలదేవపదాబ్జయుగే భువనాఖిలపోషణ శ్రీవిభవే । నవపఙ్కజహారవిరాజగలే శరణం శరణం గజలక్ష్మి నమః ॥ ౨౬॥

ఘనభీకరకష్టవినాశకరి నిజభక్తదరిద్రప్రణాశకరి । ఋణమోచని పావని సౌఖ్యకరి శరణం శరణం ధనలక్ష్మి నమః ॥ ౨౭॥

అతిభీకరక్షామవినాశకరి జగదేకశుభఙ్కరి ధాన్యప్రదే । సుఖదాయిని శ్రీఫలదానకరి శరణం శరణం శుభలక్ష్మి నమః ॥ ౨౮॥

సురసఙ్ఘశుభఙ్కరి జ్ఞానప్రదే మునిసఙ్ఘప్రియఙ్కరి మోక్షప్రదే । నరసఙ్ఘజయఙ్కరి భాగ్యప్రదే శరణం శరణం జయలక్ష్మి నమః ॥ ౨౯॥

పరిసేవితభక్తకులోద్ధరిణి పరిభావితదాసజనోద్ధరిణి । మధుసూదనమోహిని శ్రీరమణి శరణం శరణం తవ లక్ష్మి నమః ॥ ౩౦॥

శుభదాయిని వైభవలక్ష్మి నమో వరదాయిని శ్రీహరిలక్ష్మి నమః । సుఖదాయిని మఙ్గలలక్ష్మి నమో శరణం శరణం సతతం శరణం ॥ ౩౧॥

వరలక్ష్మి నమో ధనలక్ష్మి నమో జయలక్ష్మి నమో గజలక్ష్మి నమః । జయ షోడశలక్ష్మి నమోఽస్తు నమో శరణం శరణం సతతం శరణం ॥ ౩౨॥

నమో ఆదిలక్ష్మి నమో జ్ఞానలక్ష్మి నమో ధాన్యలక్ష్మి నమో భాగ్యలక్ష్మి । మహాలక్ష్మి సన్తానలక్ష్మి ప్రసీద నమస్తే నమస్తే నమో శాన్తలక్ష్మి ॥ ౩౩॥

నమో సిద్ధిలక్ష్మి నమో మోక్షలక్ష్మి నమో యోగలక్ష్మి నమో భోగలక్ష్మి । నమో ధైర్యలక్ష్మి నమో వీరలక్ష్మి నమస్తే నమస్తే నమో శాన్తలక్ష్మి ॥ ౩౪॥

అజ్ఞానినా మయా దోషానశేషాన్విహితాన్ రమే । క్షమస్వ త్వం క్షమస్వ త్వం అష్టలక్ష్మి నమోఽస్తుతే ॥ ౩౫॥

దేవి విష్ణువిలాసిని శుభకరి దీనార్తివిచ్ఛేదిని సర్వైశ్వర్యప్రదాయిని సుఖకరి దారిద్ర్యవిధ్వంసిని । నానాభూషితభూషణాఙ్గి జనని క్షీరాబ్ధికన్యామణి దేవి భక్తసుపోషిణి వరప్రదే లక్ష్మి సదా పాహి నః మామ్ ॥ ౩౬॥

సద్యఃప్రఫుల్లసరసీరుహపత్రనేత్రే హారిద్రలేపితసుకోమలశ్రీకపోలే । పూర్ణేన్దుబిమ్బవదనే కమలాన్తరస్థే లక్ష్మి త్వదీయచరణౌ శరణం ప్రపద్యే ॥ ౩౭॥

భక్తాన్తరఙ్గగతభావవిధే నమస్తే రక్తామ్బుజాతనిలయే స్వజనానురక్తే । ముక్తావలీసహితభూషణభూషితాఙ్గి లక్ష్మి త్వదీయచరణౌ శరణం ప్రపద్యే ॥ ౩౮॥

క్షామాదితాపహారిణి నవధాన్యరూపే అజ్ఞానఘోరతిమిరాపహజ్ఞానరూపే । దారిద్ర్యదుఃఖపరిమర్దితభాగ్యరూపే లక్ష్మి త్వదీయచరణౌ శరణం ప్రపద్యే ॥ ౩౯॥

చమ్పాలతాభదరహాసవిరాజవక్త్రే బిమ్బాధరేషు కపికాఞ్చితమఞ్జువాణి । శ్రీస్వర్ణకుమ్భపరిశోభితదివ్యహస్తే లక్ష్మి త్వదీయచరణౌ శరణం ప్రపద్యే ॥ ౪౦॥

స్వర్గాపవర్గపదవిప్రదే సౌమ్యభావే సర్వాగమాదివినుతే శుభలక్షణాఙ్గి । నిత్యార్చితాఙ్ఘ్రియుగలే మహిమాచరిత్రే లక్ష్మి త్వదీయచరణౌ శరణం ప్రపద్యే ॥ ౪౧॥

జాజ్జ్వల్యకుణ్డలవిరాజితకర్ణయుగ్మే సౌవర్ణకఙ్కణసుశోభితహస్తపద్మే । మఞ్జీరశిఞ్జితసుకోమలపావనాఙ్ఘ్రే లక్ష్మి త్వదీయచరణౌ శరణం ప్రపద్యే ॥ ౪౨॥

సర్వాపరాధశమని సకలార్థదాత్రి పర్వేన్దుసోదరి సుపర్వగణాభిరక్షిన్ । దుర్వారశోకమయభక్తగణావనేష్టే లక్ష్మి త్వదీయచరణౌ శరణం ప్రపద్యే ॥ ౪౩॥

బీజాక్షరత్రయవిరాజితమన్త్రయుక్తే ఆద్యన్తవర్ణమయశోభితశబ్దరూపే । బ్రహ్మాణ్డభాణ్డజనని కమలాయతాక్షి లక్ష్మి త్వదీయచరణౌ శరణం ప్రపద్యే ॥ ౪౪॥

శ్రీదేవి బిల్వనిలయే జయ విశ్వమాతః వసుదాయిని ఆహ్లాదదాత్రి ధనధాన్యసుఖప్రదాత్రి । శ్రీవైష్ణవి ద్రవిణరూపిణి దీర్ఘవేణి లక్ష్మి త్వదీయచరణౌ శరణం ప్రపద్యే ॥ ౪౫॥

ఆగచ్ఛ తిష్ఠ తవ భక్తగణస్య గేహే సన్తుష్టపూర్ణహృదయేన సుఖాని దేహి । ఆరోగ్యభాగ్యమకలఙ్కయశాంసి దేహి లక్ష్మి త్వదీయచరణౌ శరణం ప్రపద్యే ॥ ౪౬॥

శ్రీఆదిలక్ష్మి శరణం శరణం ప్రపద్యే శ్రీఅష్టలక్ష్మి శరణం శరణం ప్రపద్యే । శ్రీవిష్ణుపత్ని శరణం శరణం ప్రపద్యే లక్ష్మి త్వదీయచరణౌ శరణం ప్రపద్యే ॥ ౪౭॥

మంగళ శ్లోకాలు

మఙ్గలం కరుణాపూర్ణే మఙ్గలం భాగ్యదాయిని । మఙ్గలం శ్రీమహాలక్ష్మి మఙ్గలం శుభమఙ్గలమ్ ॥ ౪౮॥

అష్టకష్టహరే దేవి అష్టభాగ్యవివర్ధిని । మఙ్గలం శ్రీమహాలక్ష్మి మఙ్గలం శుభమఙ్గలమ్ ॥ ౪౯॥

క్షీరోదధిసముద్భూతే విష్ణువక్షస్థలాలయే । మఙ్గలం శ్రీమహాలక్ష్మి మఙ్గలం శుభమఙ్గలమ్ ॥ ౫౦॥

ధనలక్ష్మి ధాన్యలక్ష్మి విద్యాలక్ష్మి యశస్కరి । మఙ్గలం శ్రీమహాలక్ష్మి మఙ్గలం శుభమఙ్గలమ్ ॥ ౫౧॥

సిద్ధలక్ష్మి మోక్షలక్ష్మి జయలక్ష్మి శుభఙ్కరి । మఙ్గలం శ్రీమహాలక్ష్మి మఙ్గలం శుభమఙ్గలమ్ ॥ ౫౨॥

సన్తానలక్ష్మి శ్రీలక్ష్మి గజలక్ష్మి హరిప్రియే । మఙ్గలం శ్రీమహాలక్ష్మి మఙ్గలం శుభమఙ్గలమ్ ॥ ౫౩॥

దారిద్ర్యనాశిని దేవి కోల్హాపురనివాసిని । మఙ్గలం శ్రీమహాలక్ష్మి మఙ్గలం శుభమఙ్గలమ్ ॥ ౫౪॥

వరలక్ష్మి ధైర్యలక్ష్మి శ్రీషోడశభాగ్యఙ్కరి । మఙ్గలం శ్రీమహాలక్ష్మి మఙ్గలం శుభమఙ్గలమ్ ॥ ౫౫॥

మఙ్గలం మఙ్గలం నిత్యం మఙ్గలం జయమఙ్గలం । మఙ్గలం శ్రీమహాలక్ష్మి మఙ్గలం శుభమఙ్గలమ్ ॥ ౫౬॥

ఇతి శ్రీమహాలక్ష్మీసుప్రభాతం సమ్పూర్ణమ్ ।